Frå eit av verdas vakraste reisemål til eit av verdas beste lokalsamfunn?

Flåm har utvikla seg til å bli eitt av dei mest attraktive reisemåla i Noreg. Gjennom langsiktige investeringar, tett samarbeid mellom offentlege og private aktørar og ei tydeleg satsing på kvalitet har reiselivet skapt arbeidsplassar, aktivitet og ny verdiskaping i regionen. Men vekst kjem ikkje av seg sjølv – og han er heller ikkje verdifull dersom han ikkje styrkjer lokalsamfunna. Korleis kan reiselivet bidra til levande bygder, fleire heilårsarbeidsplassar og berekraftig utvikling? Kva rolle spelar samarbeid, eigarskap og langsiktig tenking? Og kva kan resten av landet lære av erfaringane frå Flåm? På denne samlinga møter du aktørar frå Norways Best, Aurland kommune og norsk reiseliv som deler erfaringar frå utviklinga av reisemål i verdsklasse. Gjennom innlegg og samtalar utforskar vi korleis reiselivet kan bli ei drivkraft for lokal verdiskaping, attraktive lokalsamfunn og berekraftig vekst – og kva som skal til for at suksessen kjem både innbyggjarar, næringsliv og framtidige generasjonar til gode.